علي نجم لمدونة KORBLOG: أخبار مدونتك في برنامجي!

علي نجم .. اسم سطع في سماء الكويت والخليج من خلال اذاعة المارينا اف ام 88.8. يعد علي من متابعي المدونة القدم وقدملي الدعم الكبير وحبيت اردله الدعم من خلال لقاء حصري على المدونة نناقش فيه اهم الاسئلة الي الناس حابين يعرفونها عنه بعيدا عن أضواء الدبلوماسية في الصحف. خلال هذا اللقاء صدمني علي نجم بجملة قالها “أنا أخذ مواضيع واخبار من مدونتك واعرضها في برنامجي” .. جملة اسعدتني بشدة خاصه كونه مثال كبير لعدة شباب منهم انا في تحقيق حلمه والدراسة في وقت واحد. اليكم ما جاء في اللقاء.


على اي اساس اخترت مرينا اف ام ؟ 
المرينا ماخترتها لانها اهي اختارتني بعد فوزي ببرنامج انت المذيع في 2006 بداية دخولي المسابقة ماتوقعت اني بفوز ولكن لمن وصلت مرحلة النهائية توقعت افوز والحمد لله فزت 


شنو فلمك المفضل وليش !؟

 Music of the heart و The devil wears Prada و The Iron Lady وأي فلم للممثلة Meryl Streep لانها الممثلة المفضلة عندي احبها واحب طريقة تمثيلها.


برأيك هل الموضة واللبس تحدد من شخصية الانسان ؟ وهل انت من الاشخاص الي يقيمون الناس من شكلهم ؟
لا ابد بالعكس كل شخص يحب يلبس الشي الي يناسبه ويعكس موده.


شنو الماركة المفضلة عندك ووين تحب تتسوق ؟

ماعندي ماركة مفضلة بس عندي ستايل مفضل الي اهوه يكون لبس بسيط وماحب اقلد الفاشن او اكون مهووس بالماركات وماحب الألوان الفاقعه الي تعور العين مثل الفسفوري والبرتقالي واللون الاخضر هو لوني المفضل وما اتقيد بماركة معينة بالبس جميع الماركات ماتفرق معاي مدام 100%واثق بالي انا لابسه.



في برنامج الأغلبية الصامتة هل اختيارك للاغاني مبني عالكلمات اللحن او شنو !؟
ادور الاغنية الي تخدم الموضوع الي انا اتكلم فيه مثلا يكون موضوع ببالي ابي اتكلم فيه ابدي بالبحث وبتصفح الاغاني لغايه ما القى الاغنية الي ممكن ان تنقل الاحساس الي انا ابي اقوله بالاغلبية الصامتة وبعض المرات اسمع اغنية من كثر ما انا اتاثر فيها اقدر اطلع عنوان للفقرة من الاغنية واتكلم عنه بالاختصار يا انه اسمع الاغنية واقدر اطلع عنوان للفقرة والكلام الي بقوله او ادور الاغنية الي تخدم الموضوع.


الأغلبية الصامته .. أنا صاحي لهم



ردك على موضوع اختيارك للاغنية الفائزة وعدم الاعتماد على نتيجة التصويت الحقيقية ؟

لا كلش اساسا التصويت يكون بالويب سايت والويب سايت يحسب لي نسبة معينة ولو انا احط الاغنية الفايزة جان شفت اغاني عبدالمجيد عبدالله اهيه الي على طول الفايزة بالمركز الاول ، ولذلك انا امشي مع قوانين البرنامج ولكن في ناس وايد متعصبين مثلا جمهور الفنان عبدالسلام يصوتون على طول بس مايدرون انه هناك منافسين لجمهور راشد الماجد وجمهور لكل فنان وقمت احب شلون قاموا الفنانين ياخذون التصويت بجدية وقامو ينشرون روابط التصويت بالتويتر والانستجرام باكاونتهم علشان جمهورهم يصوت لهم وهذا الشي يجعل التصويت يتطور لمستوى جديد  ، لان بعض الناس مايتقبلون انه الفنان الي يحبونه يكون خارج التوب 5 او يكون بالمرتبة الخامسة فاسهل شي يقولون انهم قاعدين يغشون و يلعبون بالنتايج فانا مو من هل النوعية.


اهداء لك عالأغنية 

 
شنو كان شعورك يوم عينوك سفير الكويت للبلاك بيري ؟ وعلى اي اساس تم اختيارك !؟

كنت وايد مستانس ومومصدق الا ليمن دعوني ورحت وحضرت مؤتمرهم وصدقني لو مو انستجرام جان ماخذيت الايفون ، وماراح امسك بلاك بيري وامدح فيه بالهوا او شي بس اهي مجرد دعم لجهاز حبيته واشكرهم على المنصب خاصة اني استعمله واعشقه من زمان.

شنو استعدادك حق رمضان وشمعنه اخترت “صاحي” !؟ وشنو فكرته ؟
انشاء الله بيكون في برنامج اسمه صاحي وبيكون game show  يعتمد البرنامج بالدرجة الاولى انك تكون صاحي طول الوقت مدام انت معاي بالهوا علشان تقدر تجاوب على الاساله الي راح اسالها لك وبيكون مع بوجندل والحجيه وام عبودي وبيكون اول برنامج يطلع عالهوا بعد كل برامج المسابقات, فتخيل الضغط الي علينا بيكون اول يوم واول برنامج وفي اخر 4 سنين انا وبوجندل والحجيه وام عبودي حققنا ارقام كبيرة من النجاحات والي نبيه نحافظ على هذه الارقام ونزيدها لهذ السنة الي بتكون خامس سنة بتكون فكرة يديدة وتحدي عالهوا بينا وبين المستمع راح نحط مقطع مكون من 5 اشياء مختلفه ماتدري شنو اهمه وماراح تدري شنو بيكون السؤال ماراح يطري على بالك ولازم تكون صاحي 100% وانت قاعد تسمع عشان تقدر تجاوب على السؤال الي اساله لك ياه


شنو مشاريعك القادمة بعد رمضان ؟
بعد رمضان راح نرد حق برنامجنا اليومي اما يكون برنامج ريفريش او بيكون شي ثاني ماراح اقول شنو اهوه بس بيكون شي راح يحبونه الناس بس بنكون موجودين عالهواء مباشره كل يوم في المساء عشان نخلي الناس فريش وسعيدين ونعطيهم كل الي يبونه بهل ساعتين الي بنقدم فيه البرنامج ان شاء الله

كيف يقضي علي نجم شهر رمضان ؟ وهل تحرص على متابعة المسلسلات ؟

احب مشاهده التلفزيون واكون updated اول باول وعندي اسمقنت اسمه حزة التحلطم الشديد ويكون كل يوم قبل فطور بثلث ساعه ولاشي بس تحلطم لان اعرف انه الكل ناطر حزة الاذان وكل الي يسونه يشوفون الانستجرام وتويتر بدت قبل سنتين ب 2011 وفي 2012 انشهرت اكثر ولكن وايد ناس يتطنزون ويقولون بسك واذيتنا اقولهم انه هذا بس تحلطم وهذا اكاونتي فكيفي بعضهم يقولون لي صل واقرا قران ومادري شنو عندي اليوم كله فلاتحكمني عشان الاوقات الي اكتب فيه بالتويتر ، وبعد البرنامج احب اقضي وقتي مع ربعي وغبقات وماحب احط نفسي بضغط برمضان وماحب احضر وايد دعوات ووايد غبقات لان احب بهذا الشهر اشيل الضغط الي علي وابتعد عن الاضواء.



مستحيل مستحيل تمثل ؟

لاني موممثل جيد وطول ما انا بالاذاعه عندك سبب انك تحبني او تكرهني بس اسوي كل ما عندي عشان ما تمسك علي بممسك بطريقة تقديمي وبطريقة القائي او اي شي لانهsomething i can do  بس اذا دشيت التمثيل راح تبطل باب الانتقادات هذا مايعرف يمثل وهذا وهذا الشي مابيه.
تحب تقرا ؟ وشنو نوع الكتب الي تقراها ؟

احب اقرا بس مو وايد اقرا السبب لان ماعندي وقت للقراءه واحب اقرا كل شي بس احب اقرا اشياء لها علاقه بالنفسيه لها علاقة بالشخصيات وشلون افهم الشخص الجدامي وشلون اتصرف معاه واحب اقرا عن horoscopes مو الي عن الحظ والتبؤات بس احب الي عن الشخصيه بالاختصار احب الاشياء الي تتكلم عن علم النفس.


 

دولة تحب تزورها كونها تحمل ذكريات لك او تحب الناس الي فيها ؟
لبنان لان بالمرتين الي رحت فيهم لبنان كانت تعكس احلى سفرتين سافرتهم مع اصدقائي وتحمل ذكريات مع ربعي


هل تؤمن بالاشباح ؟
دام موجود بالقران اكيد راح اصدق


شلون قدرت توافق بين حياتك الشخصية والدراسية مع شغلك في المارينا اف ام كوني طالب وحاب استفيد من خبرتك ؟

وايد سألوني هل سؤال وصراحتا ماقدرت اوافق بين حياتي الشخصية والدراسه مع شغلي, ما انام وساعات نومي تكون وايد قليلة وحالة نفسية موزينة ، لاني وايد سيئ بتنظيم الوقت بس شوي شوي بديت اتعلم وبديت اعدل الموضوع ولكن لمن صرت خريج بالجامعة هني بديت اعرف شلون اقسم وقتي عدل ويمشي كل شي بالطريقة الصحيحة بس بعض المرات تطلع لك شغلات فجاه وتخرب الجدول كله بس انت تقدر ” as long as you believe in both places” انت تبي ترفع من معدلك الجامعي وبنفس الوقت تبي تمارس هوايتك لذلك راح تقدر تلقى حل لهذا الشيء مهما كانت هناك مصاعب ولكن راح ترتاح بالنهاية.


السيره الذاتية لعلي نجم:
اسمه الكامل: علي نجم القوماني
مواليد: 25 مارس 1989
مهنته: مذيع ومعد ومخرج في اذاعة Marina FM الكويتية
علي شكله مو عصبي ويحب السلام بس واهوا صغير تهاوش وبسبتها اهله انقلوه من مدرسة لثانية. 
تم عرض عليه للعمل في روتانا اف ام وMBC FM الا انه رفض ليبقى مخلصا لمارينا التي فتحت له الابواب منذ البداية وتبنت موهبته.


علي نجم بالنسبة لي مصدر وحي وملهم لي واعتبره من أكبر الناس الي عطوني دافع ابذل مجهود أكبر بالمدونة, لهذا كان اللقاء مجرد شكر له … شكرا علي كونك أحد الاشخاص الداعمين لمدونة Kuwaitis On Road لعدة سنوات.

1 Comment

Click here to post a comment
%d مدونون معجبون بهذه: