مدونة ملك الرومانسية: جولة من كاريبو كافيه المارينا … الى سينيور ساسي البحر.


بالأمس طلعت مع صديقي العزيز “مهدي” بعد مرور أكثر من ٦ شهور مو شايفه بسبب دراستي بامريكا . المشكلة الي دايما تواجهنا احنا الأثنين انه ما ندري وين نروح ! لكل منا توجه والأشياء الي نتفق عليها قليلة ، ونفس الشي أمس تقريبا من سبع نص لي تسع الا ربع واحنا قاعدين نفرفر بالشوارع نسولف ونفكر شنسوي ، المهم انه بالاخير رحنا المارينا لكن للأسف كان زحمه وايد وأشكال غلط للأسف فقلت خل نروح ” كاريبو كافيه” كان فاضي وهادي وبعيد عن الهيلق. الي طلبته كان “Hotchocolate with chocolate chips and caramel Sauce ” مع كيكة الموز بالكاراميل ، وصديقي مهدي طلب سموذي البرتقال مع المانجا والليمون. الكيكة كانت شوي زينه بس طعم الموز وايد قوي فيها وشوي ثقيلة.
 المهم بعد حديث مطول وشيق حول الشهور الي طافت وشنو سوينا وجذي ، طلعنا وما ندري وين نروح نتعشى ! كانت الساعة ١٠ مساءا ، بعد فرارة ولوية قررنا نروح أبراج الكويت بعد بشوي جان نقرر نروح المطعم الايطالي Signor Sassi سنيور ساسي المتواجد مع Fish Market البحر.

 بالنسبة لي أنا طلبت نفس طلبي للمرة الثالثة على التوالي رقم 47 بالمنيو وهو عباره عن صدر دجاج مغطى بصلصة الماشروم والكريمة ومقدم مع السبارجس و مهدي صديقي طلب الباستا مع دجاج مغلف بالبقسماط بداخله سباخنه ومقطع حلقات. والمشروب كان عصير “ماي تاي” وهو عباره عن عصير أناناس وفواكه أخرى. الطلعة كانت جميلة جدا وراقيه وهادية بعيده عن المشاكل وعوار الراس وكانت فرصة رائعة للحديث مع صديق فعلا خلال الوقت تحس سوالفك ونظرتك للموضوع تتغير كل ما تكبر … 


Add Comment

Click here to post a comment

اترك رد

%d مدونون معجبون بهذه: